乜態度呀電車大哥

有日搭叮叮由銅鑼灣落天后食飯，因為唔知邊度有站，所以喺QC站時問司機哥哥（應該係八十或九十後），轉咗個彎有冇站，佢喪屍咁坐喺度，對眼望住前面，寸寸貢咁答：「山頂吖」，我當時反應唔嚟，再問咩話，佢氣定神閒再講多次「山頂呀，落唔落呀」。我真係火起，話乜你咁冇禮貌㗎，然後都費事理佢落咗車。諗番真係唔應咁樣算數，身為服務性行業，我又唔係冇禮貌，你洗唔洗咁黑人憎呀？香港多幾個呢啲垃圾都真係死得人多！

八十後

不吐真不快！返工滿月紀念，換來一肚子氣！不快，非由老闆客戶引起，反而始於一群自以為是的八十後！無大無細，直認「不嬲都係咁」。雖不應因此動氣，但對方零尊重嘅態度，為自己勇於敢作敢言而傲，實在，對於九十年代開始工作嘅我，可謂不敢恭維！膚淺到不行，認識我還不到一個月，冷血判斷我乃不可共存嘅上司！自問過去一個月來，業績雖還努力中，但已盡心盡力建立團結精神，可被信任，肯聆聽嘅人，結果換來被看為一個入侵者，可悲嗎？

聽不到「加油噢」「我哋會盡量幫忙配合」所謂鼓勵句語，只有「可能係人夾人緣吧，還是以前開心些」「你鍾意點就點囉」的悔氣說話，心淡？一定有。會否因此氣餒？只有一個月光景，沒那麼容易吧！

常有朋友告知，銀行業不可有容人之量，只會被人欺凌。可能是吧！但，良心告訴我，你對別人好，盡量做好本份，無人可以攻擊你！我無需要建立女魔頭形象，我覺得不必，讓大家難做。日久見人心，希望努力沒白費。well，可能浸淫耐一些，再可以sensative一些，事情會有好轉！

找錢

我唔明！真係唔明！每當去啲舖頭買嘢找錢時，點解啲cashier鍾意receipt，銀紙同散紙一齊俾？每次我都要將成餅嘢放番落枱再執落銀包。我都係崇日㗎喇，覺得用個盤仔找錢，個客人攞開一邊慢慢執！

Facebook

Facebook 係一樣好矛盾嘅 online tool，佢既可以令我搵番好多失散多年嘅朋友，知道一啲唔係成日見嘅朋友嘅update; 亦因為乜都網上攪掂，變相令人與人之間疏離咗，因為見都唔駛見啦，留個message咪得咯！

話雖如此，每日開 facebook，都會有啲令我覺得煩厭嘅 items。Well，純粹個人喜惡，如踩親條尾，敬請見諒！

1）煩爆 Status Update

Update 吓 status冇問題，但唔係下下都update住你做緊乜啩。「Just jogged for 20 miles on treadmill」又寫，下個鐘「watching Crimson Break」，又下個鐘「肚餓，食飯先」.... 我諗 status 係俾你話俾人聽一啲事，想人地俾意見，或者係突發/奇特事件，想同人分享，請問你跑咗幾多miles，肚餓想食飯，關人乜事呢，你想人俾啲咩反應你呢？仲要係日日update幾次，好悶呀！

有啲 status 又懶詭秘，「...so sad today」，又唔講埋落去，等啲人不停咁問「what's wrong」？係咪想知道有幾多人關心自己呢？冇人回應咪好瘀？通常呢啲都係自傷自憐，好少真係有乜咁傷心。

仲有仲有，「...Today is Friday」，唔該，可唔可以講啲我唔知嘅嘢！

2) 乜相都擺

有啲人真係去到邊，影到邊！唔緊要，不過唔該screen過先好post啦。食飯相，餐餐post，去茶餐廳又post，去飲茶又post，返阿媽屋企食飯都post，就連落街篤串魚蛋都post，都幾煩。同埋可唔可以唔好咁懶，整理吓啲相先啦，同人同地點同一個spot都可以影十幾張，只不過係擺唔同嘅甫士！

3）心理測驗

當然，唔係一竹篙打沉一船人，我自己都有玩。但係每次打開facebook，就梗有某幾個人不停將啲心理測驗結果post出嚟，我就不停咁 Hide 哂啲 test，你係「九型人格」邊一格自己知咪得咯，唔駛唱通街話俾人知。你係咪想有人肯定你係啲咁嘅人，又或者知道原來你係啲咁嘅人！？

另外，有啲test都幾無聊，好似嗰啲「你係大內密探零零發」裡面邊個角色，諗呢啲 test 出嚟嗰啲都有問題嘅，我係「天外飛仙 ~~」咁又點？有幾好玩？仲有啲仲離譜，「你究竟幾時死」，知咗係咪可以攪定身後事？不過最攪笑係個test結果話，原來自己已經死咗.....

4）儲 friend

點解有啲人會有2000個friend嘅，真係咁多？不過我唔鐘意啲人亂咁add人，都唔識，add乜呢？add完又係咪真係friend咗先？我見有啲男仔，佢有好長嘅friend list，不過好多都係啲搔首弄姿嘅女仔。我會懷疑，你啲friend全部都咁擺pose呀？唔咁擺pose唔俾做你個friend呀？咁好肯定佢係好似儲閃卡咁儲啲靚女，等其他人羨慕有咁多靚嘅女性朋友啦。

5）Photo Tag

呢個function都幾驚！有時唔知邊時邊日俾人影咗啲好核突嘅相，仲俾人tag埋，而禮貌上，又冇立即detag，要等到個album冇人評論先detag到，咁唯有set話某啲人睇唔到人地tag我啲相啦，之但係又有啲相係想俾人睇到嘅，變咗要download張相，再post喺自己個album度先得，煩到爆！ 不過，最最最煩嘅，如果自己俾人Tag咗，之後跟住嚟嘅message，無論識佢唔識佢，啲message都會係notification出現，炸爆你為止！

土司工坊 Toast Box

每次去新加坡做嘢或者旅遊時都總會預留一啲時間去食 328 加東喇沙, 同埋到啲hawker center 或者kopi tiam 食kaya toast。當知道Times Square B2 將會開純南洋風味嘅土司工坊，真係好興奮！ 開幕以嚟光顧過好幾次，食物質素雖然未及得哂新加坡，不過我覺得合格，最鐘意係Pandan Cake同埋喇沙。雖然網上有啲人俾喇沙分數好低，話啲粉點解係米線，又話喇沙應該係用匙羹食，冇理由用筷子等等。但我覺得佢湯底真係唔差，所以會繼續幫襯。不過我想講吓嘅係佢地營運上嘅問題。當然，喺呢度講得嘅梗係投訴啦！以下幾點係綜合咗我呢幾次所得嘅結論:

1）人手分配

餐廳係自助型式，除咗有賣基本食物以外，仲有一個櫃係賣bakery嘅。但係，收銀機就只得一個！無論你想買嘢食，買嘢飲，定係淨係想買個飽，都要排嗰行隊。嗱，問題就喺度喇。嗰個負責收銀嘅，落咗order，如果係熱飲就會pass俾另一個staff做，但凍飲好似barley water或者bakery就會佢負責埋，明明後面有其他人走嚟走去，點解唔叫佢地幫手，等佢可以快啲接下一個order？而得一個cashier就更加有問題，如果部機有乜事又或者落錯單就仲麻煩，閒閒地起碼要排十至十五分鐘先可以落order。試過好幾次行過淨係想買件Pandan cake走，但見條隊咁長，都係咪攪，咁就流失咗一個客，咁你話當中冇咗幾多生意呢？ 我覺得大家樂嘅set up好好，一邊排隊買飛，一邊就預備食物，大家有自己崗位。我明地方唔大未必可以有咁嘅luxury，但點都應該整多一部收銀機咯，話哂都係人多嘅銅鑼灣區，點都值得投資啩？

2）無理收費

有一次叫咗西多，見到件多士上面有塊厚牛油，但冇糖槳，亦冇除碟附上，於是就叫阿waiter哥哥攞啲嚟，佢竟然話，要加兩蚊喎，吓？ 乜西多嘅牛油同埋糖漿唔係一個default嘅配搭嚟咩？定係我見識少，南洋嘅西多本身係冇syrup嘅呢？不過咁都未算，原來問攞杯水都要收兩蚊，有冇咁過份呀？

3）黑面員工

嗰度嘅員工基本上要全部拎去再培訓！冇一個嘅面口係歡容嘅，全部都好似你殺咗佢全家咁。叫佢地執一執張枱，一係就聽唔到，一係就萬般不願意。記得有一次我地叫咗喇沙，個waiter哥哥由於睇唔到我地放咗喺枱嘅號碼牌，佢攞住兩碗粉行咗個圈，我地又唔肯定嗰兩碗粉係咪我地嘅，咁咪叫佢過嚟問係咪我地咯，嘩，佢個樣真係嚇死我，睇得出佢心裡面係講緊十八個字操口，好似責怪緊我地唔早啲叫佢過嚟。佢放低時我幾想講唔好意思喎！

莫非定律

有冇聽過「莫非定律」Murphy's Law？ 簡單啲講， 就係指「任何有可能出錯嘅事將會出錯 (Anything that can go wrong, will go wrong)」。亦都係表示「所有嘅程序都有缺陷」，或者「若缺陷有好多個可能性，佢必定會向最壞嘅方向發展」。睇完「莫非定律」嘅定律以後，我就變咗個呢個Law 嘅信徒，忠心不二。

「莫非定律」可以apply落好多生活細微嘅事情上面。講啲活生生例子: 今朝比平時遲咗幾分鐘出門口，當我行緊去巴士站途中，我見到我搭開嘅 No.5S 巴士啱啱走咗，落到山腳，連No.1都走埋，心諗，兩架車都唔同總站開出，但次次都咁啱一齊到，唉，諗住慢慢行，起碼都要等多五分鐘先再有車啦，點知一轉彎，第二架5S將要離開個站！激到我彈起！ 係咪咁邪呀？攪到要呆等多十幾分鐘先再有車，仲要係我麻麻地想搭嘅 No.1。 個定律就係咁解，你越唔想佢發生，佢就偏要發生。你冇諗過咁壞後果咩，就真係發生俾你睇。

又或者，落到地鐵，架車度門開住咗，當個腦仲諗緊衝唔衝過去之際，個身已經跑緊過去，永遠就係當你隻腳將要踏入車廂嘅一刻，車門就閂埋，尷尬到爆。最記得有一次，揸住hand carry上機鐵，驚住佢就嚟閂門，著住拖鞋都衝過去，點知煞唔切制，成隻鞋飛咗出去，差啲跣咗落車同月台之間個罅度，好彩月台邊為失明人士而鋪設嘅黃色凸線救咗一命，不過已經瘀爆啦！

話咗「莫非定律」係可以放喺任何一個生活情節裡面，你可以click入去Murphys Law official site度，搵到幾多發生過喺你身上嘅事？以下幾個我覺得幾攪笑，但好啱聽嘅。

• 六合彩頭獎四千萬而你終於中獎，但同時你亦發現同樣中頭獎嘅幸運兒有三千個
• 打golf時，越多人睇住你發球，你嗰球就打得越衰
• 落雨唔洗車，一洗就落雨
• 每一個問題題解決都會引發新題問題
• 你唔見咗嘢，最先去搵嘅地方，通常都搵唔到，但偏偏亦可能真係喺呢度，不過你冇搵清 楚。反而，你會有機會搵到嘅唔係你諗住搵嘅嘢

不過，又掉番轉嚟講，我地亦可以好樂觀咁諗：「任何有機會成功嘅事都會成功」，個定律冇講明件事一定係必好定必壞，放喺管理學角度睇，俾啲管理人知道，可以發生嘅事，總會發生，咁就可以對所有可能發生嘅事做好周全嘅準備。

台灣災民嫌棄飯盒

睇完片，不禁搖頭嘆息咁講一句，阿災民，你地冇嘢吓話？請知道，你地而家叫災民，唔駛自己搵食已經係大恩大德，最不知所謂就係訪問阿大嬸時，佢竟然話唔鐘意食，想食餐廳啲飯！不如整番個 buffet table 你啦好冇？ 睇見去到災區幫助煮食嘅好心人無奈又失望嘅回應，我都覺得心酸。學吓周麗淇話齋，應該識得感恩！

台灣發生呢啲天災橫禍，我深感同情，由始至終，我都覺得整件事需要嘅係救援隊伍，而唔係錢，你估台灣政府冇錢賑災咩？我地籌款都係出於同情心，希望盡一分力幫佢地重建家園，不過佢地俾啲咁嘅回應，仲好嫌棄咁，真係心痛！ 雖然冇咗個家同失去咗家人係好悲慘嘅事，但係喺呢個時候仲嫌三嫌四，點都講唔通。希望佢地識得反省吓！