Friday, September 11, 2009

Facebook

Facebook 係一樣好矛盾嘅 online tool,佢既可以令我搵番好多失散多年嘅朋友,知道一啲唔係成日見嘅朋友嘅update; 亦因為乜都網上攪掂,變相令人與人之間疏離咗,因為見都唔見啦,留個message咪得咯!

話雖如此,每日開 facebook,都會有啲令我覺得煩厭嘅 items。Well,純粹個人喜惡,如踩親條尾,敬請見諒!

1)煩爆 Status Update
Update 吓 status冇問題,但唔係下下都update住你做緊乜啩。Just jogged for 20 miles on treadmill又寫,下個鐘watching Crimson Break,又下個鐘肚餓,食飯先」.... 我諗 status 係俾你話俾人聽一啲事,想人地俾意見,或者係突發/奇特事件,想同人分享,請問你跑咗幾多miles,肚餓想食飯,關人乜事呢,你想人俾啲咩反應你呢?仲要係日日update幾次,好悶呀!

有啲 status 又懶秘,「...so sad today,又唔講埋落去,等啲人不停咁問what's wrong?係咪想知道有幾多人關心自己呢?冇人回應咪好瘀?通常呢啲都係自傷自憐,好少真係有乜咁傷心。

仲有仲有,「...Today is Friday,唔該,可唔可以講啲我唔知嘅嘢

2) 乜相都擺
有啲人真係去到邊,影到邊!唔緊要,不過唔該screen過先好post啦。食飯相,餐餐post,去茶餐廳又post,去飲茶又post,返阿媽屋企食飯都post,就連落街篤串魚蛋都post,都幾煩。同埋可唔可以唔好咁懶,整理吓啲相先啦,同人同地點同一個spot都可以影十幾張,只不過係擺唔同嘅甫士!

3)心理測驗
當然,唔係一竹篙打沉一船人,我自己都有玩。但係每次打開facebook,就梗有某幾個人不停啲心理測驗結果post出嚟,我就不停咁 Hide 哂啲 test,你係九型人格邊一格自己知咪得咯,唔通街話俾人知。你係咪想有人肯定你係啲咁嘅人,又或者知道原來你係啲咁嘅人!?

另外,有啲test都幾無聊好似嗰啲你係大內密探零零發裡面邊個角色,諗呢啲 test 出嚟嗰啲都有問題嘅,我係天外飛仙 ~~咁又點?有幾好玩?仲有啲仲離譜,你究竟幾時死知咗係咪可以攪定身後事不過攪笑係個test結果話,原來自己已經死咗.....

4)儲 friend
點解有啲人會有2000個friend嘅,真係咁多?不過我唔鐘意啲人亂咁add人,都唔識,add乜呢?add完又係咪真係friend咗先?我見有啲男仔,佢有好長嘅friend list,不過好多都係啲搔首弄姿嘅女我會懷疑,你啲friend全部都咁擺pose呀?唔咁擺pose唔俾做你個friend呀?咁好肯定佢係好似儲閃卡咁儲啲靚女,等其他人羨慕有咁多靚嘅女朋友啦。

5)Photo Tag
呢個function都幾驚!有時唔知邊時邊日俾人影咗啲好核突嘅相,仲俾人tag埋,而禮貌上,又冇立即detag,要等到個album冇人評論先detag到,咁唯有set話啲人睇唔到人地tag我啲相啦,之但係又有啲相係想俾人睇到嘅,變咗要download張相,再post喺自己個album度先得,煩到爆! 不過,最最最煩嘅,如果自己俾人Tag咗,之後跟住嚟嘅message,無論識佢唔識佢,啲message都會係notification出現,炸爆你為止!

Sunday, August 30, 2009

土司工坊 Toast Box

每次去新加坡做嘢或者旅遊時都總會預留一啲時間去食 328 加東喇沙, 同埋到啲hawker center 或者kopi tiam 食kaya toast。當知道Times Square B2 將會開純南洋風味嘅土司工坊,真係好興奮! 開幕以嚟光顧過好幾次,食物質素雖然未及得哂新加坡,不過我覺得合格,最鐘意係Pandan Cake同埋喇沙。雖然網上有啲人俾喇沙分數好低,話啲粉點解係米線,又話喇沙應該係用匙羹食,冇理由用筷子等等。但我覺得佢湯底真係唔差,所以會繼續幫襯。不過我想講吓嘅係佢地營運上嘅問題。當然,喺呢度講得嘅梗係投訴啦!以下幾點係綜合咗我呢幾次所得嘅結論:

1)人手分配
餐廳係自助型式,除咗有賣基本食物以外,仲有一個櫃係賣bakery嘅。但係,收銀機就只得一個!無論你想買嘢食,買嘢飲,定係淨係想買個飽,都要排嗰行隊。嗱,問題就喺度喇。嗰個負責收銀嘅,落咗order,如果係熱飲就會pass俾另一個staff做,但凍飲好似barley water或者bakery就會佢負責埋,明明後面有其他人走嚟走去,點解唔叫佢地幫手,等佢可以快啲接下一個order?而得一個cashier就更加有問題,如果部機有乜事又或者落錯單就仲麻煩,閒閒地起碼要排十至十五分鐘先可以落order。試過好幾次行過淨係想買件Pandan cake走,但見條隊咁長,都係咪攪,咁就流失咗一個客,咁你話當中冇咗幾多生意呢? 我覺得大家樂嘅set up好好,一邊排隊買飛,一邊就預備食物,大家有自己崗位。我明地方唔大未必可以有咁嘅luxury,但點都應該整多一部收銀機咯,話哂都係人多嘅銅鑼灣區,點都值得投資啩?

2)無理收費
有一次叫咗西多,見到件多士上面有塊厚牛油,但冇糖槳,亦冇除碟附上,於是就叫阿waiter哥哥攞啲嚟,佢竟然話,要加兩蚊喎,吓? 乜西多嘅牛油同埋糖漿唔係一個default嘅配搭嚟咩?定係我見識少,南洋嘅西多本身係冇syrup嘅呢?不過咁都未算,原來問攞杯水都要收兩蚊,有冇咁過份呀?

3)黑面員工
嗰度嘅員工基本上要全部拎去再培訓!冇一個嘅面口係歡容嘅,全部都好似你殺咗佢全家咁。叫佢地執一執張枱,一係就聽唔到,一係就萬般不願意。記得有一次我地叫咗喇沙,個waiter哥哥由於睇唔到我地放咗喺枱嘅號碼牌,佢攞住兩碗粉行咗個圈,我地又唔肯定嗰兩碗粉係咪我地嘅,咁咪叫佢過嚟問係咪我地咯,嘩,佢個樣真係嚇死我,睇得出佢心裡面係講緊十八個字操口,好似責怪緊我地唔早啲叫佢過嚟。佢放低時我幾想講唔好意思喎!

Thursday, August 27, 2009

莫非定律

有冇聽過「莫非定律」Murphy's Law? 簡單啲講, 就係指「任何有可能出錯嘅事將會出錯 (Anything that can go wrong, will go wrong)」。亦都係表示「所有嘅程序都有缺陷」,或者「若缺陷有好多個可能性,佢必定會向最壞嘅方向發展」。睇完「莫非定律」嘅定律以後,我就變咗個呢個Law 嘅信徒,忠心不二。

「莫非定律」可以apply落好多生活細微嘅事情上面。講啲活生生例子: 今朝比平時遲咗幾分鐘出門口,當我行緊去巴士站途中,我見到我搭開嘅 No.5S 巴士啱啱走咗,落到山腳,連No.1都走埋,心諗,兩架車都唔同總站開出,但次次都咁啱一齊到,唉,諗住慢慢行,起碼都要等多五分鐘先再有車點知一轉彎,第二架5S將要離開個站!激到我彈起! 係咪咁邪呀?攪到要呆等多十幾分鐘先再有車,仲要係我麻麻地想搭嘅 No.1。 個定律就係咁,你越唔想佢發生,佢就偏要發生。你冇諗過咁壞後果咩,就真係發生俾你睇。

又或者,落到地鐵,架車度門開住咗,當個腦仲諗緊衝唔衝過去之際,個身已經跑緊過去,永遠就係當你隻腳將要踏入車廂嘅一刻,車門就閂埋,尷尬到爆。最記得有一次,揸住hand carry上機鐵,驚住佢就嚟閂門,著住拖鞋都衝過去,點知煞唔切制,成隻鞋飛咗出去,差啲跣咗落車同月台之間個罅度,好彩月台邊為失明人士而鋪設嘅黃色凸線救咗一命,不過已經瘀爆啦!

話咗「莫非定律」係可以放喺任何一個生活情節裡面,你可以click入去Murphys Law official site度,搵到幾多發生過喺你身上嘅事?以下幾個我覺得幾攪笑,但好啱聽嘅。

  • 六合彩頭獎四千萬而你終於中獎,但同時你亦發現同樣中頭獎嘅幸運兒有三千個
  • 打golf時,越多人睇住你發球,你嗰球就打得越衰
  • 落雨唔洗車,一洗就落雨
  • 每一個問題題解決都會引發新題問題
  • 你唔見咗嘢,最先去搵嘅地方,通常都搵唔到,但偏偏亦可能真係喺呢度,不過你冇搵清 楚。反而,你會有機會搵到嘅唔係你諗住搵嘅嘢

不過,又番轉嚟講,我地亦可以好樂觀咁諗:「任何有機會成功嘅事都會成功」,個定律冇講明件事一定係必好定必壞,放喺管理學角度睇,俾啲管理人知道,可以發生嘅事,總會發生,咁就可以對所有可能發生嘅事做好周全嘅準備。


Tuesday, August 25, 2009

台灣災民嫌棄飯盒



睇完片,不禁搖頭嘆息咁講一句,阿災民,你地冇嘢吓話?請知道,你地而家叫災民,唔駛自己搵食已經係大恩大德,最不知所謂就係訪問阿大嬸時,佢竟然話唔鐘意食,想食餐廳啲飯!不如整番個 buffet table 你啦好冇? 睇見去到災區幫助煮食嘅好心人無奈又失望嘅回應,我都覺得心酸。學吓周麗淇話齋,應該識得感恩!

台灣發生呢啲天災橫禍,我深感同情,由始至終,我都覺得整件事需要嘅係救援隊伍,而唔係錢,你估台灣政府冇錢賑災咩?我地籌款都係出於同情心,希望盡一分力幫佢地重建家園,不過佢地俾啲咁嘅回應,仲好嫌棄咁,真係心痛! 雖然冇咗個家同失去咗家人係好悲慘嘅事,但係喺呢個時候仲嫌三嫌四,點都講唔通。希望佢地識得反省吓!

Saturday, August 15, 2009

櫻紅醉了 - 煩爆周麗淇


無線呢個禮拜播出由周麗淇幫TVB拍咗一連七集嘅個人特輯 「櫻紅醉了」。我本身非常鐘意日本,尤其未去過日本嘅東北部,理應每晚坐定定睇電視先係。不過睇咗兩集就覺得好惡頂,時關唔知係邊個諗出嚟嘅意思,要Niki用好抒情嘅方式去演譯獨白,由介紹景物引發一啲人生哲理。本來都冇乜問題,之但係我好怕聽到佢啲懶音,好「涼」,好「靚」,好「幸」福 (括住嘅字全都係懶音),聽到耳都側埋。加上呢個語調好悶,睇完真係瞌眼瞓,直頭有催眠作用!唔係彈三彈四,換咗第二個artist,用返同一語調,都可能好難頂,但點都應該好過Niki。

其實我比較鐘意第一輯「現代塵世美」嘅方式,Eason都不知幾生鬼!起碼搵啱人,又令觀眾投入到個節目,睇得開心之餘,我真係俾Eason嘅真性情激發我想即刻飛去Tasmania!而阿周小姐雖然咁感性,但都令我呢個哈日派狂人利用播映櫻紅醉了嘅時分變成我嘅沖涼時間,實在失敗!睇返一啲網上forum,原來發覺我唔係自己發噏風,我真係擁有同等wavelength嘅朋友㗎!而我亦將我嘅心聲放係facebook,認同嘅人都不知幾多。

今日播出最後一集,我用一個平常心去睇呢個半小時節目。睇完都不禁唧一聲笑出嚟,擰哂頭。喺短短半個鐘,佢不停咁扮感性,見呢樣又好感恩,睇嗰樣又覺得自己好幸福,懶抒情,作狀到死!救命!講一次唔夠,保守估計起碼講咗六,七次。都唔知點撰稿嘅!

最最最令我覺得難頂嘅係,Niki成日以一個受害者嘅身份出現。喺個節目度不斷話自己要堅強,跌低要企番起身。見到棵千年老樹,又話棵樹受過咁多風吹雨打仍然屹立不倒,佢覺得好感動,都要好似棵樹咁要堅強,唔好令人擔心! 啲訪問講到鄭嘉穎時又話過咗咁耐唔好提,而家邊個不斷 remind 觀眾先?

不過如果Niki想做一個好歌星,我諗不如花少少時間,學吓咬字先啦!啲懶音仲差過阿Sa!

總之今個特輯嘅敗筆係在於選錯角同埋用錯演譯方式。真係好悶呀!!

Thursday, August 13, 2009

請尊重別人宗教!

我不嬲唔鐘意啲人攞宗教嚟講笑或者踐踏,自己人都冇面俾。我自出娘胎幾個月就已經受洗,雖然冇得揀,但可能自小喺天主教學校受教育,唔多唔少受到影響,所以我不但唔抗拒,仲幾proud of自己係天主教添。不過間唔中聽到其他冇任何宗教嘅人話,啲教會人有幾煩有幾煩,信瞓覺好過信教。又話寄乜嘢託吖,大把其他嘢做啦等等!我聽到會覺得好厭惡。

唔該冇呢啲意識嘅人收一收聲。

我本身雖然係天主教,而我亦承認唔係經常去Mass,不過我學識尊重其他宗教團體,而唔會乜都唔知就踩,踩,踩!每到唔同地方旅行或者要入鄉隨俗嘅時候,就算我唔會靜心參拜,我會最多行埋一邊保持緘默,又或者跟隨大隊鞠一個躬,唔會話: 唓,我都唔拜嘅! 或: 唓,我都唔信嘅!我相信天主會體諒亦都同意我咁做。正所謂一樣米養百樣人,要知道呢個世界人有好多種,人地夠可能唔鐘意或唔認同你嘅所作所為喇!加上擁有信仰係一件正面嘅事(只要唔係邪教,教唆人旁門左道),咁做乜要踐踏人地呢?

人就係咁,永遠都唔會企喺人地嘅角度諗。我知我唔鐘意人地講天主教嘅不是,於是好自然我就唔會講人家嘅不是,呢啲係雙向嘅,就係咁簡單。

Sunday, July 26, 2009

超級巨聲主持 - 市井劉美君


人地台灣都攪咗五屆嘅超級星光大道,香港而家先有超級巨聲。好自然大家都會將兩個節目比較。先唔好講啲參賽者嘅質素,因為都仲係好early stage,不過我想講吓個所謂主持嘅劉美君。唔知係咪佢覺得咁做主持好幽默,好攪到氣氛;但我就唔係咁睇佢講說話嘅方式可以用好市井嚟形容! 尤其佢用嘅字眼非常江湖仔女, 非常MK!

佢 又唔係評判,點解每次都要窒啲參賽者, 同埋講咁多唔係佢應該講嘅說話呢? 好似有個參賽者入咗圍,評判分析緊佢嘅優劣,劉美君無啦啦話,"唏,都入咗圍,講咁多做乜啫!" 又關你事! 我最討厭就係佢攪喊啲參賽者,然後搭人地膊頭安慰話,"傻豬嚟嘅,唔好喊..." pro啲啦唔該!!

以下係我記得嘅劉美君市井語錄:
- High High High,而家high嘢喇 (話說有一參賽者唱張惠妹嘅High High High,不過入唔到圍)
- 而家唔夠分入圍喇,你話點算好 (人地都入唔到,想人點答你呀)
- 又眼濕濕,又想喊呀 (可唔可以俾啲鼓勵性嘅說話呢,激動咪喊咯,又窒)

同台灣超級星光大道嘅陶子比較,真係差好遠。唔該無線一係叫佢改吓個所謂 "風格" 或者索性換個主持,我真係好期待曹格做主持嗰集...

Thursday, July 16, 2009

又係美容院爆炸事件簿!

今日suppose 12:30pm做機,美容院11:50am call我,都心知不妙。今次個故仔係同事有啲personal嘅事趕唔切返,所以想我遲三十分鐘先去!我又要發揮我嘅爆炸精神 點解穫穫新鮮穫穫金呢? 每一次都有新excuse! 我話唔理得咁多,一定要1:30pm走,咁佢話要諗諗個schedule。差唔多要出門,又唔call番我,要我打電話先話已經幫我調咗同事,冇問題喇!好激氣!

Monday, July 13, 2009

曼谷高級美容護理中心Paris Spa


剛過去個weekend同朋友fafa到Bangkok玩,佢有朋友介紹去於Pennisula Plaza 嘅 Paris Spa做manicure/pedicure,1200baht一set,計返HKD其實又唔算非常平,大概$280,不過都去試吓

門面裝飾頗elegant。佢冇俾梳化之類嘅凳俾我地坐,只係普通嘅salon椅,唔算舒服。全程service我真係覺得屬於差。首先, 做腳嘅姐姐,做漏好多步驟,例如shave腳底好求其,幾吓就算,我指一指我個friend,俾signal佢話人地做緊磨皮喎,佢先拎個磨沙刨出嚟幫我磨。做manicure個阿姨,無問過我剪唔剪短,圓形定方形,係後尾我要求佢先剪。修cuticle淨係做側邊,中間位冇做,ok,冇剪都算,佢油nail polisher時仲油埋無剪嘅cuticle,咁望落去咪有兩層?都未夠,仲要油過界.... 點樣先.....? 佢地好似好趕咁,係咪對新客係咁呢? 見其他客人都非富則貴,點都估唔到service咁差,定係我咁唔好彩,咁啱幫我嗰兩個至係咁?

Wednesday, July 8, 2009

真係唔係想sell我?

今日新聞話凱撒會因為金融風暴,向銀行貸款失敗,終於關門大吉!唉,我嘅擔心又大咗喇。其實唔擔心得咁多,只希望快啲用減啲package,損失冇咁大啦!

今日又去做機,新嘅sales姐姐當然趁機落我迷藥,話員工集體辭職係唔成熟嘅表現,根本係杞人憂天,無根據地人走我走,點都好啦,我而家刀槍不入,點講我都聽唔入耳。佢仲想試探我知唔知其他女仔有冇搵我同講咗乜我聽,真係當我三歲咩?

記得,佢同我講咗段說話 (S: Sales, M: Me) -
S:喂,你做body嘅淋巴之外有冇做埋面部通淋巴?
M:冇喎,我塊面敏感唔掂得喎...
S:吓(晴天霹靂)!? 冇? 該燴喇!! 我估唔到阿邊個邊個冇話你聽,你做完身之後,淋巴通順咗會上腦,但你塊面啲淋巴唔通,咁會反彈落返個身度,咪即係冇用!
M:(吓?!)
S:我咁講梗係唔係叫你買package啦,我真係唔之你冇喎!
M:(心想:刀槍不入 刀槍不入 刀槍不入)

我覺得搞笑嘅地方唔係佢講嘅理論,因為我唔係做美容,冇實證知道真定假,但佢keep住講"我真係唔係叫你買package"呢個好好笑!咁老實講,唔係叫我買,你講我知,想點呢?

講開做機,今日個美容師真係唔掂!佢慢手慢腳,話咗佢知我趕時間佢都慢條斯理,真係唔得醒!

Sunday, July 5, 2009

蠱惑的plan

星期日,做機日!喺架電梯度見到另一個customer仲有staff Mag, 個女士同Mag講 "喂, Mag, 今日你幫我做呀,有淋巴啦, A機啦, 仲有B機, right?" 我聽聽吓... 咦, 個rundown咁熟嘅, 咪即係同我今日做嘅一模一樣? 但係, 我知間美容院得一部A機喎... 咁即係點? 我去到都有問一次我會做啲乜,reception都話我個rundown啱喎!咁唔理得咁多啦!通淋巴個staff第一次幫我做,佢話做完嘅時候我覺得好似好快咁,不過我個人唔係咁計較,睇定啲先!跟住做A機啦,做咗十分鐘有人敲門,係Mag! 佢問架機仲有幾耐先available,個staff話仲有十分鐘! 嗱嗱嗱,仲唔係玩蠱惑?明明兩個客撞哂機,用啲咁低劣嘅手法?我後尾做完所有treatment之後發覺,真係唔見咗十分鐘! 講明顯啲,我同另一個customer嘅schedule都係一樣,但佢地個trick就係食咗我十分鐘淋巴,等我用咗部A機先,再拖另一個客十分鐘等我用完部機,真係過份。

Saturday, July 4, 2009

美容院爆炸日記

上個星期朋友仔call我話我地去開嗰間美容院有啲問題,死啦我package仲有好多添!拿拿淋call間shop諗住book定啲schedule,連lunch都爆呀!越越唔妥,於是响facebook add咗幫我做機嘅姐姐。傾開先知佢地好多個已經resign咗喇,last day仲係七月頭,立即叫佢二日call我book得幾多得幾多,好驚啫! 諗住自己冇咁好彩㗎嘛,總之由宜家開始就要打仗啦。

姐姐話老闆好衰,佢雖然冇講有啲乜惡行,我諗都係欠糧之類嘅問題。我最驚係間shop會唔會有事關門大吉, 咁我package就凍過水。連日嚟都忙於收風,希望知多啲最新發展。收集哂啲情報,應該係老闆娘前排攞啲錢周轉,放响另外啲舖同仔女,仲爭落員工啲MPF。

聽講走咗嗰班人可能另起爐灶,而家係睇緊合適舖位,但我唔諗去唔去住喇,攪掂呢邊先算啦!都話啦,諗住俾錢relax,攪都好似打怪獸咁,又唔知佢地出啲乜嘢橋氹我地,覺得好大壓力,又唔講俾人知,費事俾人話蠢啦。

呢單嘢都可謂十個爆炸!reception走哂啲人,新嚟嗰啲全部唔得,每次去之前攪到亂哂龍,會打嚟話staff好多sick leave,安排唔到其他人,我呢啲惡霸梗係唔會打死罷就,話booking做咗,冇理由冇人唔識做,叫佢地自己拆掂佢再打俾我!果然惡係大哂,過一陣就打嚟話攪掂!

今日同個staff傾電話,佢話有日有個客打俾佢,話俾個新嚟嘅staff做爆脂,冇落gel加上定位爆,攪到個肚burn紅咗,又唔敢告佢(驚有咩事間shop會摺)於是就打俾我呢個staff friend。佢教個客點樣急救同敷aloe products,好彩第二日好番好多。你話得唔得人驚?!

連之前有個staff話俾我聽佢對間shop幾有信心,咪最後搵到工resign埋,呢個世界啲人講乜都冇用! 總之啲員工同老闆有乜牙齒印我唔理,最緊要乖乖地唔好執住,等我kill多啲coupon先!聽聞嚟咗啲勁consultant喎,真係要見招拆招喇。

Tuesday, June 2, 2009

新記車仔麵 -- 太過份了!!

有好一段時間沒有到新記,還記得以前是$5一款餸,消費最低為$20,湯底不俗,味道尚可,所以是吃快餐的一個好選擇。但當我昨晚再光顧後,就跟自己說,今後都不會再去。

首先,每款餸加價到$7一款,至低消費$28,已經覺得不妥。我點了貢丸,墨魚丸,牛肚,蘿蔔,唐生菜,雞翼,蠔油冬菇七款。餸來了,用筷子攪了攪,眉都皺起來。貢丸,墨魚丸由原來standard size變成好像麥提莎那般大,牛肚由原來size剪開起碼四小條,整碗只有最多八小條。

我想,加價可能避不了,但偷工減料得這麼厲害,簡直不知所謂。兩個人吃了兩碗車仔麵加一個飲品就要$106,是否有點那個呢?

要知道車仔麵定義為方便抵食,俗稱嗱渣麵,以我以前order同樣食物只用$35,現盛惠$49,加了整整40%,最無理還是食物質素下降,實太過份! 
huffyhuffyhuffy

Sorry,我應該不會再光顧了。