請尊重別人宗教！

我不嬲唔鐘意啲人攞宗教嚟講笑或者踐踏，自己人都冇面俾。我自出娘胎幾個月就已經受洗，雖然冇得揀，但可能自小喺天主教學校受教育，唔多唔少受到影響，所以我不但唔抗拒，仲幾proud of自己係天主教添。不過間唔中聽到其他冇任何宗教嘅人話，啲教會人有幾煩有幾煩，信瞓覺好過信教。又話寄乜嘢託吖，大把其他嘢做啦等等！我聽到會覺得好厭惡。

唔該冇呢啲意識嘅人收一收聲。

我本身雖然係天主教，而我亦承認唔係經常去Mass，不過我學識尊重其他宗教團體，而唔會乜都唔知就踩，踩，踩！每到唔同地方旅行或者要入鄉隨俗嘅時候，就算我唔會靜心參拜，我會最多行埋一邊保持緘默，又或者跟隨大隊鞠一個躬，唔會話: 唓，我都唔拜嘅! 或: 唓，我都唔信嘅！我相信天主會體諒亦都同意我咁做。正所謂一樣米養百樣人，要知道呢個世界人有好多種，人地夠可能唔鐘意或唔認同你嘅所作所為喇！加上擁有信仰係一件正面嘅事（只要唔係邪教，教唆人旁門左道），咁做乜要踐踏人地呢？

人就係咁，永遠都唔會企喺人地嘅角度諗。我知我唔鐘意人地講天主教嘅不是，於是好自然我就唔會講人家嘅不是，呢啲係雙向嘅，就係咁簡單。